На першим почесним месце у фондзе старопечатних церковнославянских кнїжкох у "Рускей Одлоги", без сумнїву, стої "Нови Завит зоз Псалтиром" зоз 1583. року, и то друкарске витворенє велькоруского, московского першопечатнїка Ивана Фйодорова, зоз периоду його пребуваня и твореня у Южней Руси у Остроґу.

Кнїжка, як у нєй єднозначно зазначене, була власнїцтво жителя дюрдьовского, а по походзеню Керестурца, Янка Мудрого. По родзинскей линиї вона прешла до приватней библиотеки Мудрового праунука, познєйше владики Крижевского, тераз уж покойного кир Славомира Микловша, а записовач тих виреченьох - чукунунук першобутного власнїка Янка Мудрого, пренашол ю у цеку прескладованя библиотеки пре билєня владикового родного обисца, 2009. року.

З поштреднїцтвом "Матици Сербскей" дошло ше до потвердзеня першобутней особней предпоставки о ванрядносци пренаходку, и друкарским авторству преславеного Ивана Фйодорова.

Того 2017. р. на кнїжки поробене позарядово значне реставраторске подняце, хторе тирвало цали єден рок. Отже, конзерваторско-реставрацийни отдїл "Народней Библиотеки Сербиї" у Беоґрадзе закончел цалосну защитно-оправкову роботу на кнїжки и вона тераз випатра як нова.

Ношитель проєкту реставрациї "Нового Завиту зоз Псалтиром" Церковне общество при Св. Храме св. архистратига Михаила - Ґосподїнци, зоз материялно-пенєжну помоцу Уряду за сотруднїцство зоз Церквами и вирскима заєднїцами при Министерству Правди Р. Сербиї - Беоґрад.