КАНДИДАТИ ЗА ПЕРШОПРИЧАШНЇКОХ У ШКОЛСКИМ РОКУ 2015/16
Дзешец другокласних школярох ше пририхтую за Першу Святу Причасц.
У тим чечуцим школским року 2015/16 пририхтуюцих ше за Першу св. Тайну Причасци єст дзешец другокласних школярох. Три дзивчата и седемцме хлапци. За тоту значну подїю у їх живоце будзе их у рамикох основношколскей виронаучней настави пририхтовац вироучитель, дипломовани теолоґ Данил Задрепко, но, розуми ше, поволую ше и їх родичи, же би зоз шицкима своїма родительскима воспитнима мирами допринєсли їх цо обсяжнєйшей и темельнєйше пририхтаносци.
Насампредз ше родителє поволую, же би свойо кандидатни дзеци за Першу Святу Причасц каждонєдзельно посилали до Церкву на нєдзельну Литургию. Гутори ше, же найлєпше воспитанє то - ВЛАСНИ ПРИКЛАД.
Праве прето, духовни резултат- и хасенприношаце може буц лєм шлїдуюце: Совокупни заєднїцки фамелийни приход шицких членох єдного семейства на нєдзельну воскресну Службу Божу. У тим смислу витайце у нашим заєднїцким парохиялним Св. храме, на першим наиходзацим нєдзельним ЄВХАРИСТИЙНИМ СОБРАНЮ - БОГОСЛУЖАЦИМ ПРЕСЛАВЙОВАНЮ ГОСПОДА.
ДАТУМ ОТРИМОВАНЯ ПЕРШЕЙ ПРИЧАСЦИ
Остатня нєдзеля у мешацу юнию, НЄДЗЕЛЯ ШИЦКИХ СВЯТИХ - 26. юний 2016
ЦО ПЕРШОПРИЧАШНЇКИ МУША ЗНАЦ
Минимум шицких минимумох то знанє напамат вигуториц два основни християнски молитви: Молитву Господну - ОТЧЕ НАШ и БОГОРОДИЦЕ ДЇВО, як и молитву пред- и по споведзи:
ОТЧЕ НАШ
Отче наш, котри ши на нєбе, най ше швеци мено Твойо, най придзе Царство Твойо, най будзе воля Твоя, як на нєбе, так и на жеми. Хлєб наш насущни дай нам нєшка, и одпущ нам длуства нашо, як цо и ми одпущуєме длужнїком нашим. И нє уведз нас до спокуси, алє нас вибав од злого.
БОГОРОДИЦЕ ДЇВО
Богородицо Дїво, радуй ше, Благодатна, Господь зоз Тобу. Благословена Ти медзи женами и плод утроби твоєй, бо ши народзела Христа Спасителя, душох наших.
МОЛИТВА ПРЕД СПОВЕДЗУ
Я гришни споведам ше Господу Богу Вседержительови, у Тройци Святей Єдини, Пречистей Дїви, Мацери Божей, шицким святим, и вам отче мой духовни о шицких своїх грихох.
МОЛИТВА НА КОНЦУ СПОВЕДЗИ
За тоти шицки знани и нєзнани свойо грихи, жалуєм сердечнє, же сом доброжичлївого Бога увредзел, и оддрилєл од себе. Каєм ше жалошнє, и обецуєм, же з помоцу Божу живот свой полєпшам. На тото змирено модлїм, отче мой духовни, модляцу покуту и од Бога розришенє.
